Published On: Tuesday, January 17, 2012
இந்திய அணிக்கு அனைத்து தரப்பிலும் இருந்து அவமானங்கள் குவிகின்றன
அவுஸ்திரேலியவுக்கு எதிரான டெஸ்ட் தொடரில் 3&0 என்ற கணக்கில் படுதோல்வியை சந்தித்த இந்திய அணிக்கு அனைத்து தரப்பிலும் இருந்து அவமானங்கள் குவிகின்றன. அவுஸ்திரேலிய சென்றுள்ள இந்திய கிரிக்கெட் அணி 4 டெஸ்ட் போட்டிகள் கொண்ட தொடரில் விளையாடி வருகிறது. ஆஸ்திரேலிய மண்ணில் ஒருமுறை கூட டெஸ்ட் தொடரை வென்றதில்லை என்ற வரலாறை இந்திய அணி இம்முறை தகர்த்தெறியும் என எதிர்பார்த்த ரசிகர்களுக்கு டோனி அன்ட் கோ பெருத்த ஏமாற்றத்தை அளித்துள்ளது.
முந்தைய தொடர்களைக் காட்டிலும் இந்த முறை நமது வீரர்கள் படுமோசமாக விளையாடி, முதல் 3 டெஸ்டிலும் தோல்வியை சந்தித்து தொடரை இழந்து விட்டனர். பெர்த்தில் நடந்த 3வது டெஸ்ட்டில் இந்திய அணி இன்னிங்ஸ் மற்றும் 37 ரன் வித்தியாசத்தில் படுதோல்வியை சந்தித்ததன் மூலம் அனைத்து தரப்பிலும் இருந்து அவமான பேச்சுகள் குவிந்த வண்ணம் உள்ளன.
அவுஸ்திரேலியமீடியாக்கள் இந்திய வீரர்களை கேலியும், கிண்டலும் செய்து விமர்சித்துள்ளன. ‘பில்டிங் ஸ்ட்ராங்கு.. பேஸ் மட்டம் வீக்கு’ என நம்மூர் சினிமா காமெடியை போல, இந்திய அணியின் பேட்டிங் வரிசையை கூறியிருக்கிறார்கள். ‘எதிர்க்க திராணியில்லாத கேப்டன் டோனி’, ‘எதற்கும் உதவாத பேட்ஸ்மேன்கள்’ என்று அங்குள்ள முன்னணி பத்திரிகைகள் செய்தி வெளியிட்டுள்ளன. பத்திரிகையாளர்கள் கூட்டத்தின் போது, ஆஸ்திரேலிய கேப்டன் மைக்கேல் கிளார்க்கிடம் ஒரு நிருபர், ‘ஏதோ கத்துக்குட்டி அணியான வங்கதேசத்துக்கு எதிராக விளையாடுவதை போல உணர்கிறீர்களா’ என்று கிண்டலாக கேள்வி கேட்டுள்ளாராம்.
இதே போல, இந்திய அணியின் முன்னாள் வீரர்களும் கடுமையாக விமர்சித்துள்ளனர். ‘கிரிக்கெட்டில் ஆதிக்கம் செலுத்தவும், பணம் சம்பாதிப்பதில் மட்டுமே இந்திய கிரிக்கெட் வாரியம் சிறப்பாக செயல்படுகிறது. அந்த கவனத்தை வீரர்கள் மேல் செலுத்தினால் இது போன்ற அவமான தோல்விகள் நேராது’ என்று கூறியிருக்கிறார் கபில்தேவ். ‘இப்போதுள்ள இந்திய அணியால் வெளிநாட்டில் எந்த அணியையும் தோற்கடிக்க முடியாது’ என்று கூறியிருக்கிறார் சவுரவ் கங்குலி. ‘ஆஸ்திரேலியாவில் இந்திய தோற்பது புதிதல்ல.
ஆனால், எந்த எதிர்ப்பும் இல்லாமல், துவண்டுபோவதை இம்முறைதான் பார்க்கிறேன்’ என்கிறார் இங்கிலாந்தின் முன்னாள் கேப்டன் மைக்கேல் வாகன்.
மேலும், தோல்வியை தாங்கிக் கொள்ள முடியாத ரசிகர்களும் பல்வேறு இடங்களில், உருவ பொம்மை எரித்தும், வீரர்களின் உருவ படங்களுக்கு செருப்பு மாலை போட்டும் தங்கள் எதிர்ப்பை வெளிப்படுத்தியுள்ளனர்.
படுதோல்வி குறித்து கேப்டன் டோனி கூறுகையில், ‘கேப்டன் என்ற முறையில் தோல்விக்கு நானே முழு பொறுப்பு ஏற்றுக் கொள்கிறேன். இந்த தோல்வியின் முக்கிய குற்றவாளி நான்தான். இம்முறை சீனியர் வீரர்கள் சோபிக்க தவறி விட்டனர். அவுஸ்திரேலிய வின் தட்பவெப்ப நிலைக்கு ஏற்றவாறு விளையாட நமது வீரர்கள் தவறியுள்ளனர்.
தோல்வியின் விளிம்பில் தான் வெற்றிக்கான ஆரம்பம் பிறக்கும். அதைப் போல, கடைசி டெஸ்டிலிருந்து நமது வீரர்கள் வெற்றிப் பாதைக்கு திரும்புவார்கள் என நம்புகிறேன். முத்தரப்பு தொடரில் நிச்சயம் திறமையை வெளிப்படுத்துவோம்‘ என்றார். அடுத்து நடக்க உள்ள முத்தரப்பு ஒருநாள் தொடரிலாவது இந்திய வீரர்கள் சிறப்பாக ஆடி கோப்பை வென்று சாதிக்க வேண்டியது அவசியம்.
.jpg)
